ለተተኪው ጠቅላይ ሚንስትር የመልካም ምኞት መግለጫ እና አገራዊ የለውጥ ጥሪ!
በተከታታይ የህዝብ ትግል እየታየ ያለው ለውጥ ጠንካራ አቅም እና ሙሉ ስልጣን ያለው አመራር ይፈልጋል!
በዘመናዊ የኢትዮጵያ የመንግስት ታሪክ ውስጥ የህዝቦች የለውጥ ፍላጎት በመንግስት አሰራር ላይ ተፅእኖ ከማሳረፍ አልፎ መንግስትን እና ስርአትን እስከመቀየር የደረሰ ብርቱ ሀይል እንደሆነ ይታወቃል፡፡ ህዝብ የለውጥ ጥያቄ የሚያቀርበው እንዲለወጥ መቀልበስ የመንግስት አሰራር ሲኖር አልያም ከህዝብ ፍላጎት የማይመጣጠኑ እና ከህዝብ ጥቅም በተቃራኒ የሚካሄዱ አሉታዊ ሂደቶችን ለመቀልበስ ነው፡፡ እነዚህ ምክንያቶች ባሳለፍናቸው አመታት ለህዝቦች የለውጥ ጥያቄ መነሳት እና ወደ ሰፊ ህዝባዊ ትግል መግባት ምከንያት ሆነዋል፡፡ ሙስሊሙ ማህበረሰብም የመንግስት እና ሀይማኖት መለያየትን የሚደነግገውን ህገመንግስት የሚፃረር የመንግስትን በሀይማኖት ጉዳዮች ጣልቃ ገብነትን በመቃወምና የሙስሊሙን ተቋም በነፃነት ህዝብ ያስተዳድረው የሚለውን ጥያቄ በማንሳት የለውጥ ጥያቄን ካነሱ የህብረተሰብ ክፍሎች አንዱ ነው፡፡ ሁሉም ህዝባዊ ትግሎች በመንግስት እና አጠቃላይ በአገራችን ላይ የራሳቸውን ተፅእኖ አሳርፈዋል-እያሳረፉም ይገኛሉ፡፡ ከነዚህ ተፅእኖዎች አንዱ መንግስት እያደረጋቸው ያሉ የአመለካከት፣ የአካሄድ እና አዲሱ የድርጅቱ ሊቀመንበር ምርጫን የመሰሉ የአስፈፃሚዎች ለውጥ ተጠቃሽ ናቸው፡፡ በድርጅቱ አሰራር መሰረት ተመራጩ ሊቀመንበር የአገራችን ተተኪ ጠቅላይ ሚንስትር እንደሚሆን ታሳቢ በማድረግ ይህ የጋራ መልዕክታችንም በዋናነት ተተኪውን ጠቅላይ ሚንስትርና የመረጣቸውን ድርጅት የሚመለከት ይሆናል፡፡
እንደሚታወቀው ተተኪ ጠቅላይ ሚንስትር የመምረጡ ሂደት ባልተለመደ ነገር ግን የህዝቦችን የለውጥ ጥያቄን ታሳቢ ባደረገ መልኩ ተካሂዷል፡፡ ምርጫውን ያልተለመደ ከሚያደርጉት ምክንያቶች ውስጥ አዲሱ ጠቅላይ ሚኒስትር የቀድሞው ጠቅላይ ሚንስትር የስራ ዘመናቸውን ሳይጨርሱ ያስረከቡት ኃላፊነት ላይ መተካታቸው፣ ከ 27 አመት የኢህአዴግ የሹም ሽር አካሄድ ወጣ ባለ መልኩ በበርካታ ውጣውረዶችና በውጥረት ውስጥ መስተናገዱ፣ ሂደቱ የህዝብን ሰፊ ትኩረት የሳበ መሆኑ እና ውጤቱም አንፃራዊ በሆነ መልኩ ሰፋ ያለ ቅቡልነት ያገኘ መሆኑ ጥቂቶቹ ናቸው፡፡ የልዩ ባህሪያቱ ዋና ምንጩ ደግሞ የበርካታ ንፁሀን ህይወት የተከፈለባቸው እና ሺዎችን ለእስር የዳረጉ ተከታታይ ህዝባዊ ትግሎች አንድ ውጤት በመሆኑ ነው፡፡ ከዚህ በተጨማሪም ተተኪው ጠቅላይ ሚንስትር ለአመታት በዘለቀ የህዝቦች ትግል የተጀመረ የመንግስት የተሀድሶ እርምጃ ውጤት መሆናቸው ነው፡፡ በዚህ ህዝባዊ ግፊትና ድርጅታዊ የለውጥ ሂደት መነሻ ወደስልጣን ለመጡት ተተኪ ጠቅላይ ሚንስተር ዶክተር አብይ አህመድ የመልካም ምኞት መግለጫችንን ስናስተላልፍ ለለውጡ መንስኤ የሆኑትን በተለየ ሁኔታ ድሉ የነርሱ እንደሆነ በማስታወስና አዲሱን መሪ የወለደውን የተሀድሶ ሂደትም በአዎንታዊ መልኩ እውቅና በመስጠትም ጭምር ነው፡፡
የቀድሞው ጠቅላይ ሚኒስትር የአገልግሎት ዘመናቸውን ሳያገባድዱ ኃላፊነታቸውን ያስረከቡት በአገሪቱ ውስጥ ያሉት ስር የሰደዱ ችግሮች በርሳቸው የአመራር አቅም እና የስልጣን መጠን ሊቀረፉ ባለመቻላቸው ነው፡፡ እንደ ሙስሊም ማህበረሰብ ባደረግነው ሰላማዊ የመብት ማስከበር እንቅስቃሴ ጉዳያችንን ለሁሉም የመንግስት መዋቅር አድርሰናል፡፡ ተሰናባቹ ጠቅላይ ሚንስትርም ጉዳያችንን በተለያየ መልኩ በጽ/ቤታቸው ያስተናገዱት ቢሆንም መፍትሄ ለመስጠት ግን ተግባራዊ እርምጃ እንዳይሄዱ ያደረጋቸው የአቅምም የአሰራር እንቅፋትም እንደነበረባቸው ምስክሮች ነን፡፡ ስልጣናቸውን ያስረከቡበት መንገድ ኃላፊነት የሚሰማው አመራር ሊያደርገው የሚገባው መሆኑ እንደተጠበቀ ሆኖ ከስልጣን መልቀቃቸው ግን በርሳቸው እግር ለሚተካው አመራር የሚያስተላልፈው መሰረታዊ መልዕክት አለ፡፡ ይኸውም፡- ለአመታት ከአንድ እርከን ወደሌላ እርከን፣ ከአንድ ትግል ወደ ሌላ ትግል በቅብብሎሽ የቀጠለው የህዝቦች የለውጥ ፍላጎት መልስ ሊሰጥ የሚችለው የህዝብን ፍላጎት የሚያሟላ አቅምም ስልጣንም ያለው አመራር እንጂ የግለሰቦች የወንበር መተካካት ብቻ አለመሆኑን ነው፡፡ በመሆኑም ተተኪው ጠቅላይ ሚንስትር የተሸለ አቅሙን በተግባር ሊያስመሰክርና ይህንን ለማድረግ የሚያስችለውን ስልጣን የሚጠቀምበት መዋቅራዊ አሰራር ሊፈጠር እንደሚገባ በሁሉም ዘንድ የሚጠበቅ ነው፡፡
ባሳለፍናቸው አመታት ዜጎች የመብት ጥያቄዎችን በሰላማዊ መንገድ ሲያቀርቡ ቆይተዋል፡፡ የሙስሊሙ ማህበረሰብ ሰላማዊ ትግልን ጨምሮ የሁሉም የመብት ጥያቄዎች አነሳስ በቀላሉ መፍትሄ ሊሰጣቸው የሚችሉ ቢሆኑም የመንግስት ምላሽ ግን በተቃራኒው ሆኖ ዘልቋል፡፡ በተለያዩ የህብረተሰብ ክፍሎች እየተነሱ በተደጋጋሚ ሰሚ ያጡ የመብት ጥያቄዎች ለጥያቄ አቅራቢዎቹ የሚሰጡት መልዕክት ‘በአገሪቱ የህዝብ ጥያቄ የሚያስተናግድ አሰራር እና እልባት የሚሰጥ አቅም ያለው አመራር አለመኖሩን’ ነው፡፡ ይህ በአንድ አገር የመንግስት አሰተዳደር ውስጥ በጣም ከፍተኛ የሚባል ቀውስ ነው፡፡ የዜጎቹ ጉዳይ የማይገደው መንግስትና በመንግስታቸው ተስፋ የቆረጡ ዜጎች ድምር ውጤትም አገራዊ ቀውስ ነው፡፡ በዚህ መንግስት ወለድ በሆነ አገራዊ ቀውስ ብዙዎች ውድ ህይወታችን አጥተዋል፣ ከቤት ንብረታቸው ተፈናቅለዋል፣ ታስረዋል፣ በፖለቲካዊ ፍረጃ እንዲሸማቀቁ ሆን ተብሎ ዘመቻ ተከፍቶባቸዋል፣ የህግ እገዳ ተጥሎባቸው አገር ጥለው ተሰደዋል፡፡ አገራችን አዲሱን ጠቅላይ ሚንስትር የተቀበለችውም በዚህ መስቀለኛ መንገድ ውስጥ በምትገኝበት ወቅት ነው፡፡ ለአዲሱ ጠቅላይ ሚንስትር የተቸረው አንፃራዊ ቅቡልነት ምንጩም የህዝቡ ከዚህ መስቀለኛ መንገድ የመውጣት ፍላጎትና ተመራጩ በተለያዩ አጋጣሚዎች ያስተላለፏቸው ተስፋ ሰጪ ቃሎች ወደመሬት ወርደው የማየት ፍላጎት ነው፡፡ እኛም እንደዜጋ እና እንደህዝብ ጥያቄ መፍትሄ አፈላላጊ ኮሚቴ በዚሁ መንታ መንገድ እና ተስፋ በማድረግ ስሜት ውስጥ መሆናችን አልቀረም፡፡
አዲሱ ጠቅላይ ሚንስትር ኃላፊነታቸው ከምን ግዜውም በተለየ የበዛ እንደሆነ ማስታወስ ተገቢ ነው፡፡ አዲሱ አመራር ዜጎችን በተባበረ ክንድ ከመንግስት ጎን ለማሰለፍ የሚችለው ህዝብ የጠየቃቸውና በመንግስም ቃል የተገቡ የለውጥ ውሳኔዎች ወደመሬት ወርደው መተግበር ሲጀምሩ ነው፡፡አዲስ አመራር ለውጥ ማምጣት የሚችለው አሮጌው መንገድ የሚወስድበትን የተሳሳተ አቅጣጫ ባለመከተልና ወቅቱ የሚፈልገውን ብቃት በማሳየት ነው፡፡ በተመሳሳይ መልኩ የትኛውም አመራር ያለህብረተሰቡ ድጋፍ ውጤታማ ስለማይሆን ህዝቡ በራሱ ትግል ያስጀመረውን የለውጥ ሂደት በብስለት ለውጤት እንዲበቃ የሚጠበቅበትን እንዲወጣም ማስታወስ እንፈልጋለን፡፡
የህዝብ ብሶትን የፈጠሩት በዋናነት ኃላፊነታቸውን በአግባቡ ባልተወጡ በየእርከኑ ባሉ አመራሮች ምክንያት እንደሆነ ይታወቃል፡፡ በቅርብ አመታት ለነበሩ በይፋ ለሚታወቁ ህዝባዊ ትግሎች መነሻ ከሆኑት ውስጥ አገርን ከስልጣን ያለማስቀደም፣ የፍትህ ስርአቱ በህግ የበላይነት መርህ ብቻ አለመስራት፣ ስልጣንን ተገን አድርጎ የህዝብ ሀብትን ለግል ጥቅም ማዋል እና በሀይማኖት ጉዳይ ጣልቃ በመግባት የዜጎችን የእምነት ነፃነት መንፈግ ዋነኞቹ ነበሩ ማለት ይቻላል፡፡ በመሆኑም ምላሽ ያጡ የዜጎችን የመብት ጥያቄዎች ሊመልስ የሚችል ጠንካራ ካቢኔ ማቋቋም እና ለህግ ተገዥ የሆነ መዋቅራዊ አሰራር መከተል ቅድሚያ የሚሰጠው ተግባር እንደሆነ እናምናለን፡፡ የተጀመረው የፖለቲካና የህሊና እስረኞችን የመፍታት ጅምር በማስፋት ሀሳባቸውን በመግለፃቸውና የመብት ጥያቄ በማንሳታቸው የተለያዩ የወንጀል ስያሜዎች ተከሰው በመላ አገሪቱ ታስረው የሚገኙትን መፍታት፤ ንፁሀንን ለእስር የሚዳርጉ ህጎችን ማንሳት አዲሱ አመራር አዲስ ሀሳብ ያነገበ መሆኑን የሚያሳይበት የመጀመሪያው እርምጃ ሊሆን ይገባል፡፡ እንደ ሀገር የምንገኝበትን ስር የሰደደ ድህነት የሚቀርፉና የብዙሀኑን ፍትሀዊ ተጠቃሚነት የሚያረጋግጡ ሪፎርሞች ሳይዘገይ ካልተጀመሩ ሁሉንም የለውጥ ሂደቶች ጠልፎ ይጥላቸዋልና ልዩ ትኩረት እንዲሰጣቸው እንጠይቃለን፡፡ በተለይ ሁሉን አቀፍ እድገት ለማምጣት ማህረሰባችን ያለውን የእምነት ስብጥር እና አካባቢያዊ ተጨባጭ ታሳቢ ያደረጉ አማራጭ የኢኮኖሚ ፖሊሲዎችና ትግበራዎች ትኩረት ሊሰጣቸው ይገባል፡፡ ሁሉንም የለውጥ ሂደቶች ዘላቂ እንዲሆኑ እና አገራችንን ወደተሻለ አካታች የፖለቲካ ስርአት ለማሸጋገር መንግስት ከፖለቲካ ሀይሎች፣ ከብዙሃን ማህበራት እና በማህበረሰቡ ውስጥ ወሳኝ ሚና ካላቸው አካላት ጋር ለዘላቂ መፍትሄ መምከር እንደሚጠበቅበት እንጠቁማለን፡፡
ከላይ ካነሳናቸው ግዜ የማይሰጣቸው የለውጥ እርምጃዎች አንድ አካል የሆነውና በተለየ መልኩ እንደኮሚቴ አፅንኦት ልንሰጠው የምንፈልገው ደግሞ ባለፉት ስድስት አመታት ሙስሊሙ ማህበረሰብ ሲያነሳቸውና መሰዋእትነት ከፍሎባቸው እልባት ያለገኙ እምነት ነክ ጉዳዮቻችን ናቸው፡፡ መንግስት እንደሌሎች የመብት ጥያቄዎች ሙስሊሙን ማህበረሰብ ያስተናገደበት አግባብ የተሳሳተ መሆኑን ቢዘገይም እንደተረዳው እናምናለን፡፡ አሁንም ቢሆን አዲሱ አመራር በሙስሊሙ ስም ያለሙስሊሙ እውቅና ከተቀመጡ አቅሙም ተሰሚነቱም ከሌላቸው አካላት ወጣ ብሎ የህዝቡን ችግሮች ሊፈቱ ለሚችሉ አማራጮች አዲስ እድል ሊሰጥ ይገባል፡፡ ካለፈው ስህተት ትምህርት በመውሰድ ብዙሀኑን ያሳተፈ እና የብዙሀኑን ፍላጎት የተቸረው የጠንካራ መሪ ድርጅት መኖር ለህዝቡም ለአገርም ያለውን ጠቀሜታ ታሳቢ በማድረግ አስፈላጊው እርምጃ ሊወሰድ እንደሚገባ አስምረን ማለፍ እንፈልጋለን፡፡
የመንግስት ተቋማትና አስፈፃሚ ግለሰቦች የነበራቸውን የተዛነፈ አመለካከት አስተካክለው ለተሸለ አገራዊ መግባባት የሚሰራበት እድል እንዲፈጠርም ወቅቱ አሁን እንደሆነ እናምናለን፡፡ በተለያዩ ሀይማቶች መካከል መልካም መግባባት እንዲጎለብትና ይህም ለአገራዊ ልማትና ሰላም አስተዋፅኦ እንዲያበረክት የሁሉም ሀይማኖት ተከታዮች ተስተካካይ የህግ እና ተቋማዊ መብቶች ባለቤት ሊሆኑ ይገባል፡፡ በስተመጨረሻም የአዲሱ አመራር አዲስ አካሄድ በለውጥ ጉዞ ውስጥ ተባባሪን የማብዛት ስልት ሊሆን እንደሚገባው በማመን የለውጥ ጥያቄ ያነሳነውን ሰፊ የህብረተሰብ ክፍሎችን አስተባብሮ እንዲንቀሳቀስ ጥሪያችንን ስናቀርብ ይህንን ወሳኝ አገራዊና ህዝባዊ ኃለፊነት እኛም እንደህዝብ ወኪል አዎንታዊ በሆነ መልኩ እንደምናየው በመግለፅ ነው፡፡
መጪው ግዜ ለአገራችን እና ለህዝባችን የተሻለ እንዲሆን አላህን እንለምነዋለን!
የሙስሊሙ ጥያቄዎች መፍትሄ አፈላላጊ ኮሚቴ
መጋቢት 20/2010
አዲስ አበባ
