ጊዜው ሚያዚያ 24 ቀን 1989 ዓ.ም ነበር፡፡ ባለቤቴ አቶ ሙሉ አምባው ፈረደ በጨካኞቹ የህወሃት አፋኝ ቡድኖች ታፍኖ ከተሰወረ እነሆ 21 ዓመት አለፈው፡፡ ከቤቱ ወጥቶ የማምሸትም ሆነ የማደር ልማድ ያልነበረው የ3 ልጆቼ አባት ሙሉ በወጣበት ሲቀር ያሳለፍኩትን የስቃይ ሌሊት ከደረሰበት ሰው በቀር ከቶ ማንስ ሊረዳው ይችላል?! በወቅቱ ከደረሰብኝ ጭንቀት የተነሳሳላብድ የመቅረቴን ምስጢር ዛሬ ላይ ሆኜ ሳስበው ልጆቼ ያለ እናትና አባት እንዳይቀሩ ፈጣሪ አስቦላቸው ነው እላለሁ፡፡
ሚያሲያ 25 ቀን 1989 ዓ.ም በጥዋት ተነስቼ የሄድኩት ወደ አንጋፋው የመምህራን ማህበር ጽ/ቤት ነበር፡፡ ጥብቅ ጓደኛው የነበረውን አሰፋ ማሩን ለማነጋገር፡፡ ከአሰፋ ጋር ተገናኘሁ፡፡ ዛሬም ድረስ በጆሮዬ በሚያቃጭለው መልካም አንደበቱ ብዙ መከረኝ፡፡ አረጋጋኝ፡፡ አጽናናኝ፡፡ ቀጥሎም ለሚመለከታቸው የመንግሥት አካላትና መንግስታዊ ላልሆኑ ድርጅቶች በደብዳቤም ሆነ በአካል እየቀረብኩ እንዳመለክት በአጽኖት ነገረኝ፡፡ የሚያሳዝነው ግን ሚያዚያ 30/1989 ዓ/ም አሰፋ ማሩ በፋሽስቱ ህወሃት ጥይት ተበላ፡፡
አሰፋን በድንገት አድብቶ መግደል– ባለቤቴን ሙሉን ለ21 ዓመት ያህል ከቤተሰብ መሰወር የአስፈለገበት ምክንያት ለእኔ እስከዛሬ ድረስ ግልጽ አይደለም፡፡ ሁሉም ኢትዮጵያዊ እንደሚያውቀው በ1989 ዓ/ም የህወሃትን መንግሥት ሊገለብጥ ወይም ሊቀናቀን የሚችል በህቡም ሆነ በግልጽ የተደራጀ ኃይል ወይም ድርጅት እንዳልነበር ይታወቃል፡፡ ወንጀል ሰርተው ወንጀለኞች ሆነው ቢገኙ እንኳን በፍርድ ቤት መዳኘት ሲቻል አንድ መንግሥት ነኝ ከሚል ተቋም እንዲህ ያለ ሀላፊነት የጎደለው የማፊያ ሥራ መስራት ከቶ ምን ሊባል ይችላል? ኢትዮጵያ እንድትጠፋና ኢትዮጵያዊ ካባችንን ለማስወለቅ ገናከጥንስሱ አማራውን በአውራ ጠላትነት ፈርጆ የተነሳው ህወሃት የዘር በቀለኝነቱን እየተወጣብን መሆኑ ይሆን?
ለኢትዮጵያ ሕዝብ ዛሬ በግልጽ ጮኸቴን አሰማለሁ! ለ21 ዓመት ብሶቴን እንዳልተነፍስ ታፍኜ ኖሬያለሁ! ይህ የአልተሰማ ጩኸት የእኔ ብቻ ሳይሆን የብዙ ሺህ ኢትዮጵያዊያት ሚስቶች ጩኸት ነው!
የብዙ ኢትዮጵያዊያት እናቶች ጩኸት ነው!!
የብዙ ኢትዮጵያውያን ልጆች ጩኸት ነው!!
የብዙ እህቶች ጩኸት ነው!
የብዙ ወንድሞች ጩኸት ነው!
በትግራይ የጨለማ እስር ቤት ለ24 አመት የሚማቅቁትን የሊቁን የእደስራቸው አግማሴን 9 ቤተሰብ የሰቆቃ ሕይወት ለመገንዘብ ሰው መሆን ብቻ ይበቃል፡፡ የሊቁ ጉዳይ በመታወቁ እየተጮኸላቸው ነው፡፡
በአራቱም የአገሪቱ ማዕዘን እየታፈኑ ተወስደው የት እንዳሉ ያልታወቁትንና በየጨለማ ቤቱ የሚማቅቁትን ሞተው የትምየተጣሉትን አቤት! ባይ ያጡ በብዙ ሽዎች የሚቆጠሩ ዜጎቻችንደግሞ ቤቱ ይቁጠረው፡፡ ልክ እኔ እንደሆንኩት ሁሉም በየጓዳ ሀዘኑን በአንጀቱ ቋጥሮ እዬዬ!! እያለ ለተቀመጠው ድምጽ እንሁነው፡፡ ወገኖቼ! ድምጽ ሁኑን፡፡ አብራችሁን ጩሁ!! ሞቶ መቅበር ቁርጥ አለው፡፡ ሞቶ ያልቀበሩት ሰው ሁኔታ ግን ያስጨንቃል፡፡
ሳቃያችን! ጭንቀታችን! ግፍና በደላችንይታያችሁ! ይሰማችሁ፡፡ በአንድ እጅ አይጨበጨብም፡፡ የአንድሰው ጩኸት አይሰማም፡፡ አብራችሁን ጩኹ!! ከኖሩም መኖራቸውን ከሞቱም መሞታቸውን እንወቅ፡፡
እኔ በራሴ ባላቤቴን ካማጣቴ በተጨማሪ ብዙ በደል ደርሶብኛል፡፡ ጩኸቴን እንዳላሰማ ተከልክያለሁ፡፡ ለህይወቴ እስክሰጋ ድረስ ክትትል ተደርጎብኛል፡፡ ለልጆቼ እንኳ በትክክልአባታቸው እንዴት እንደ ተሰወረ ለማስረዳት ተቸግሬ ነው የኖርኩት፡፡ ሰለ አባታቸው ምንም ነገር እንዳያነሱ—ለጓደኞቻቸውም እንዳይነግሩ ሳስጠነቅቃቸው ነው የኖሩት፡፡በናፍቆት ከመሸማቀቃቸው በላይ የአባታቸውን ሁኔታ የማወቅና የመገንዘብ መብታቸውን ተነፍገው ነው ያደጉት፡፡ ይህን ያደረኩት በየጊዜው በሚደርስብኝ ጫናና ማስፈራሪያ ነበር፡፡ እኔ እንኳ በህይወት ኖሬ እነሱ ማደግና ራሳቸውን መቻልነበረባቸው፡፡ በየጊዜው የአባታቸውን ድንገት ከቤት ወጥቶመሰውር በየጊዜው እየነገርሁና እያወያየሁ ስቃያቸው ንባለመጋራቴ ሳሬ ክፉ የህሊና ወቀሳ አትርፎብናል፡፡ በልጆቼ ላይበፈጸምኩት የፍርሀት እቀባ እስከወዲያኛው ጸጸቱ አይለቀኝም፡፡ ለልጆችና ለቤተሰብ የማይራራው ህወሃት እኔንም እንዳያጠፋኝፈሪ ሆንኩ፡፡ ፍርሀት ግን ደጋግሞ ሲገለኝ ኖረ፡፡ ይህንን የታመቀ ብሶት ለመተንፈስ ይመስለኛል በ2008 ዓ.ም «ያልተቋጨ ጉዞ» የሚለውን በእውነተኛ ታሪክ ላይ የተመሰረተ መፍሀፌን በድፍረት ያሳተምኩት፡፡
አገራችን ለ27 ዓመት የተገዛችው ኢህአዴግ በሚሉት ድርጅት ስም በህወሃት ነው፡፡ ህወያት ደግሞ ለጭካኔው ቃላት የማይገኝለት ገዳይና አፋኝ ድርጅት ለመሆኑ በየተግባር ያየነው ነው፡፡ በዘር ለያይቶ አባልቶናል፡፡ እኛም ጀርባችን አመቻችተን እንዲጋልበን ፈቅደንለታል፡፡
ጠ/ሚ ዶ/ር አብይ ከተመረጡ ወዲህ ግን (ድርጅቱ ያው ኢህአዴግ የሚሉት ቢሆንም) ኢትዮጵያና ኢትዮጵያውያን ትንሽ የተስፋ ጭላንጭል እየሰነቅን እንገኛለን፡፡ በኢትዮጵያ ታሪክ በተለይ ከ40 ዓመት ወዲህ ለመጀመርያ ጊዜ ኢትዮጵያንና ሕዝቧን የሚያከብር መሪ አይተናል፡፡ ሰለፍቅርና ይቅር ሰለመባባል የሚሰብክ መሪ አግኝተናል፡፡ ሰለ መተባበር ጠቃሚነት የሚያመላክት የሰለጠነ አስተሳሰብ ያለው መሪ ሰጥቶናል፡፡ መወያየት የችግሮች ሁሉ መፍትሄ መሆኑን የሚሰብክ ሀላፊነት የሚሰማው ለ21ኛው ምዕተ ዓመት አስተሳሰብ የሚመጥን ወጣት መሪ ኢትዮጵያ ሰጥቷታል፡፡ ለመጀመርያ ጊዜ ጠመንጃ እንደማይጠቅምና በአገሩ ጉዳይ ላይ ያገባኛል የሚል ሁሉ ለውይይት መቅረብ እንዳለበት አምኖ ለማሳመን የሚጥር መሪ አግኝተናል፡፡ ከዚህ በተጨማሪም በኢትዮጵያ ምድር በፖለቲካ አቋምም ሆነ በማንኛውም ነገር ሰው በአገሩ ላይ ተሸማቆና ፈርቶ መኖር እንደሌለበት አስምሮበታል፡፡ ይህንን እድል በመጠቀም እኔም ለ21 ዓመት አፍኜ ይዤው የኖርኩትን ብሶቴን የማሰማበት ጊዜው አሁን እንደሆነ ተሰምቶኛል፡፡ ለ21 ዓመት ያልተሰማ ጩኸቴ ኢትዮጵያዊ ወገኔ ሁሉ እንዲሰማውና አብሮኝ እንዲጮህ ጥሪዬን ከአክብሮት ጋር አቀርባለሁ፡፡ በዚህ አጋጣሚም ጠ/ሚ/ዶ/ር አብይ ለዚህ ዓይነቱ አቤቱታ መልስ እንደሚሰጡ ተስፋ አደርጋለሁ፡፡
ይህ ጩኸት የእኔ ብቻ ሳይሆን የብዙ ኢትዮጵያውያት እናቶች፣አባቶች፣ሚስቶች፣ልጆች፣እህቶች፣ወንድሞች ጩኸት ነው!!
ሰውን አፍኖ በመሰወር ቤተሰብን ማሸማቀቅና መበደል በእኔና በመሰሎቼ ያብቃ!!
እግዚአብሔር ኢትዮጵያንና ሕዝቧን ይባርክ!!
amelmad@gmail.com
