የዘመናዊ ፖለቲካችን ፍኖተ ካርታ | አንዷአለም አራጌ

እነዚህን ተቋማት መገንባት እስካልቻልን ድረስ ነገራችን ሁሉ የእንቧይ

ካብ መሆኑ ይቀጥላል::

6ኛ. እስከሞት ድረስ የምንፀናላቸው መርሆዎች ባለቤት መሆን

ከአያሌ የፖለቲካ ችግሮቻችን በተጓዳኝ ይኸን ያህል ዘመን አገዛዝ ይሰለጥንብን ዘንድ ግድ ያሉን አያሌ ሁኔታዎችን ማንሳት ይቻላል:: ከእነርሱ ውስጥ አሸርጋጅነት ጎላ ብሎ የሚታይ ይመስለኛል:: በየዘመኑ ግፍን የሚቃወሙ የአይበገሬነት ተምሳሌት የሆኑ ጀግኖች ሀገራችን አጥታ ባታውቅም የሰንበሌጥ ፖለቲካ የሚጫወቱ አያሌ ወገኖች በየዘመኑ እንደ እንጉዳይ ፈልተው ሲያድሩ ይስተዋላል:: መርህ አልባነት የአድርባዮች መርህ ነው:: ከግፍ ከውሸት ከሕገወጥነትና ከግብረ ገብነት አፈንግጦና በፍርሃት ቆፈን ተቀይዶ ለግፈኞች ውዳሴ ማህሌት መቆም:: የመከራውን ሌሊት ያስረዘመው ይኸን የግፍ ቋት የሆነ አካሄድ በግል በማኅበረሰባችንም ሆነ በሀገር ደረጃ ከስሩ ተመንግሎ ሊጣል ይገባዋል:: እውነት፣ ነጻነትና ሰብኣዊ ልዕልና አቋራጭ መንገድ የላቸውም በመርህ በእውነትና በፍቅር ላይ ቆመን ህልማችንን ለመጨበጥ መትጋት ይገባናል::

7ኛ. ዘመኑን የሚመጥኑ አስተሳሰቦችን መታጠቅ

ስለ ኢትዮጵያን ጥንታዊ ገናና ሥልጣኔ ብዙ እናወሳለን:: የሚጎድለው እንዳች አገር የሌለ እስኪመስል ድረስ አብዝተን እናቆለጳጵሰዋለን:: የሚጎድለው ኖረም አልኖረ በሩቁ ዘመን አባቶቻችን የሠሯቸውን ነገሮች የሚጠጋ ነገር በዚህ ዘመናዊ ዓለም መሥራት አልቻልንም:: ሁኔታው በምን ዓይነት የአስተሳሰብ ድርቅ እንደተመታን ያሳያል:: ከቆዩ ክፉ አስተሳሰቦች መላቀቅ ደግሞ የሞት ያህል ያስጨንቃል:: ሰዎችን የሐሳብ መስመራቸውን ተከትሎ ከመከራከር ይልቅ በዘር ወይንም በጥቅም መነፅር ብቻ የማየት ሀሳብ ተፀናውቶናል:: ይህን መሰሉ የፖለቲካ እይታ ደግሞ እጅግ ኋላቀርና በማኅበረሰብ እድገትም በስረኛውና በመጨረሻው ንጣፍ ላይ የሚገኝ ነው:: ወደ ኋላ ዕያየን ወደ ፊት እንሮጣለን:: ዘመኑን የሚመጥን አስተሳሰብ ባለቤቶች መሆን ይገባናል:: የመፍታት ችግር በስፋት ይታይብናል:: ተግባቦታችን እርስ በእርሳችንም ሆነ ከሌሎች ጋር ደካማ ነው:: በአመዛኙ ዝግ ነን ቢባል ማጋነን አይሆንም:: በዜግነታችን ላይ አለመተማመን ሲታከል ደግሞ ዳፋው ፈርጀ ብዙ ነው:: ስለዚህ ሁልጊዜም ለአዲስና ከእኛ ለተለዩ አስተሳሰቦች መዘጋጀት ያሻናል:: በሰብኣዊና ሥነ ልቦናዊ ብቃታችንም ሙሉ መተማመን ሊኖረን ይገባል::

8ኛ. ቁርጠኝነት

የምንቆምለትን ዓላማ ካልተገባ ጥቅም ከከንቱ ውዳሴም ሆነ ከአቋራጭ መንገድ በፀዳ መልኩ በእውነትና በምንሰራው ነገር ትክክለኛነት በፍፁም በማመን መጀመር ተገቢ ነው:: ለተሰጠንለት ዓላማ ለውጤት መብቃት የምንችለውን ሁሉ ለመክፈል ቁርጠኝነቱ ያስፈልጋል:: ብዙ ጊዜ የኋላ ታሪካችንን መለስ ብለን ስናይ ወይንም በትውልድ የኋልዮሽ ስንታይ ከሚያኮሩ ነገሮች መካከል በጉዳዮች ላይ የያዝነው አቋም ብቻ ሳይሆን አቋማችን ወደ ተግባር ለመለወጥ በወሳኝ ወቅት የምናሳየው ቁርጠኝነት ትልቁ መገለጫችን ይመስለኛል:: ይህን የመሰለውን ሰብዓዊ ጥራት ማዳበር ለግላዊ እድገትም ሆነ ለማኅበረሰብ እድገት የሚኖረው አስተዋፅኦ ከፍ ያለ ነው::

9ኛ. የታዛቢነት ፖለቲካ ይምከን

በተለይ ከ1960ዎቹ መሠረት ያደረገ እልቂት በኋላ ምሁራን ወደ ትግሉ መመለስ ቀጥ ያለ ተራራን የመቧጠጥ ያህል ከብዶን ቆይቷል:: አሁንም ቢሆን ትልቅ ሥራ የሚጠይቅ ጉዳይ ሆኗል:: የኢትዮጵያችን ምሁራን መናኸሪያ የውጭ ሀገር ታዛ ከሆኑ ከራርሟል:: በርግጥ ከእነርሱ ውስጥ ጥቂቶቹም በተለያዩ መንገዶች ታግለዋል:: አብዛኛው ግን በአርምሞ መታዘብን መርጠዋል:: አርምሞው ምን ዓይነት መንፈሳዊ ልዕልና እንዳጎናፀፋቸው የሚያቁት እነርሱ ብቻ ናቸው:: ያም ሆኖ በተለያየ መልኩ ሲደመጡ ስለኢትዮጵያ ፖለቲካና ፖለቲከኞች አያሌ ህፀፆችን ያነሳሉ:: የኢትዮጵያን ፖለቲከኛ ፖለቲከኞች ችግሮች ማውሳት ምንም ዓይነት ምሁራዊ ትንታኔ የሚያሻው አይደለም:: ፖለቲከኞች እውቀትም ሞራልም ሆነ ተሞክሮው ላይኖረን ይችላል፣ በአመዛኙም እንደዚህ ነው:: መፍትሔው ግን ፖለቲከኞች ሞራል ስለሌላቸው ሞራል ያላቸው ምሁራን መሳተፍ ወይንም ሌሎች ብቃቱና እውቀቱ እንዲሁም ሞራሉ ያላቸው ወገኖች እንዲታገሉ መታገል ነው::

10ኛ. ፀረ ዘረኝነት ዘመቻ ማወጅ

ሁላችንም አንድ የሚያደርገን አንድ ነገር ካለ የመጀመሪያው ፀረ ዘረኝነት ዘመቻ ይመስለኛል:: በዘረኝነት የሚያንስ፣ የሚከሰስና የሚጎዳ እንጂ እነዚህ እውነቶች ተቃራኒው የገጠመው ግሰብም ሆኖ ማኅበረሰብ ማቅረብ አንችልም:: “Groups are more immoral than individuals” (ቡድኖች ከግለሰቦች ይልቅ ኢሞራላዊ ናቸው) እንዳሉት ዶ/ር ማርቲን ሉተር ኪንግ በሀገራችንም ሆነ በሌሎች ሀገሮች የምንመሰክረው ከዚህ የተለየ አይደለም:: ዘረኝነት የአንድን ዘመን ትውልድ ብቻ ሳይሆን ያልተወለዱ ልጆቻችን ሀፍረት ስለመሆኑ ብዙ ማጣቀሺያዎች ማቅረብ ይቻላል:: በሀገራችን ዕያየን ያለነው የዘረኞችና ዘረኝነት የይዋጣልን ጥሪ በጊዜ እልባት ካልፈለግንለት ልንነቃ ወደ ማንፈለግበት ክፉ ህልም ይዞን ይወርዳል:: እንደ ሀገር እንደ ትውልድም ሆነ እንደ ሕዝብ ከዘረኝነት በላይ የሚያከስረን የሚያረክሰንና የሚያሳንሰን የክፋ ደዌ ሊኖር አይችልም:: ስለዚህ በዘረኝነት ላይ ግንባር ላለመፍጠር ማናችንም በቂ ምክንያት ሊኖረን አይችልም::

11ኛ. “በራሳችሁ ላይ እንዲደረግ የማትሹትን በሌሎች ላይ አትድርጉ”

ይህ ኃይለ ቃል የሃይማኖቶቻችን ሁሉ ወርቃማ መርህ ነው:: ምንአልባት ስንክሳር ለበዛበት የፖለቲካ ችግራችን ትልቁ መፍትሔ ይመስለኛል:: ለራሱ ሰብኣዊ ክብር ጥቅምና ነጻነት ቀናኢ የሆኑ ሁሉ ከልብ ሊታጠቁት የሚገባ እውነት ይመስለኛል:: ሞራላዊ ግባችንን ኢሞራላዊ በሆነ መንገድ ማሳካት ፈፅሞ ተገቢነት አይኖረውም:: የሰው ልጅ ትልቁን ሽልማትም ሆነ ቅጣት ከህሊናው ይቀበላል:: ለእኔ ሁልጊዜ ወደ ሞት አፋፍ ሲወርድ በሰዎች ላይ ስላደረኩት ክፋት ማድረግ ሲገባኝ ስላልፈፀምኩት ተግባር መጸጸት የሞት ሞት ይመስለኛል:: በመሆኑም ለሁላችንም በጎ በሆኑና በሚጠቅሙ ጉዳዮች ላይ መቆም ብሎም መታገል ተገቢ ነው::

12ኛ. ፍቅር እንዲያሸንፍ እንፍቀድለት

ዶ/ር ኪንግ፣ ኒቼ ፍቅርን አቅመቢስ እንደሆነ የቆጠረው ፍቅር ውስጥ ያለውን ኃይል ስለማያውቅ ነው፤ ይላሉ:: በግሌ ሰላማዊ ትግል ላይ የሙጥኝ ስል የፍቅር መንገድ ፍፁም የሆነ የግፍና የአንባገነንነት ማርከሻ መሆኑን በማመኔ ነው:: ከኃይል ሁሉ የበረታው ኃይል ፍቅር ውስጥ ያለው ነው:: ምንም እንኳን ዛሬ የኢትዮጵያ ሰላማዊ ትግል መንገድና ውጤት ከቁብ የሚፅፈው ያለ ባይመስልም ፣በፍቅር ዘመንጠገቡን የአገዛዝ ተራራ ለመናድ ፣ሳይገድሉ ለመሞት የቆረጡ ወጣቶቻችን የፈፀሙት ገድል ከሁሉ ለከበረው እውነት የተከፈለ መስዋዕትነት ነው:: ማናችንም በፍቅር ማሸነፍ እንደምንችል አሁን ያለንበት ዘመን እማኝነቱን ይሰጣል:: ዶ/ር ዐቢይ በፍቅር ብዙዎችን ትጥቅ አስፈትተዋል:: የጓድ መንግሥቱም ሆነ የአቶ መለስ አፈ ሙዝ መማረክ ያልቻለውን የኢትዮጵያውያንን ልብ ዝቅ ብለው በፍቅር እየማረኩ ይገኛሉ:: ትልቅ ማስተዋል ነው:: አሁንም ለፍቅር ተጨማሪ እድል አብዝተን ልንሰጠው ይገባል:: የምናጭደው ስኬት ዛላም እንዲሁ እጥፍ ድርብ ይሆናል::

13ኛ. የተስፋ ፅናት ይኑረን

ኢትዮጵያችን ሁሉም ነገር በጅምር የሚገኝባት ሀገር ነች:: የመጣነው መንገድ ቀላል ባይሆንም እራሳችንን ለእረፍት ለማዘጋጀት የሚበቃ ውጤት ላይ በአንዳንችንም ዘርፍ ላይ አልደረሰንም:: ይህ ሁኔታ ልብ ያዝላል፡፤ በመከራ ውስጥ ውጤት እንደሚገኝ ማመን የሰው ልጅ የትኛውንም የአገዛዝም ሆነ የችጋር ድቅድቅ የሚገፍ ኃይል የተሞላ መሆኑን ማመን ወሳኝ ነው:: በተስፋ ሙላትና በአይበገሬነት የተሞሉ ኢትዮጵያውያን በየዘመኑ የሰሩትን ማስታወስ በዚህ ዘመን ትልቅ ዋጋ ይኖረዋል:: በሰዎች ላይ በግፍ እስካልተነሳ ንድረስ የሚጨነግፍ ተስፋ አይኖርም:: አሁን ከመቼውም ጊዜ በላይ የተስፋ እጦትን በተስፋ ሙላት የምንተካበት ዘመን ነው::

ለዘመናት በጥይት ባሩድ የጠቆረው ሰማያችን የዴሞክራሲ ጠል እስኪያንጠባጥብ ድረስ በተስፋ ሙላት ልንታገል ይገባል:: ጥላቻና ዘረኝነት ያነፈራቸው የወገኖቻችን ልቦች ፍቅርና ወንድማማችነት እስኪያብቡባቸው ድረስ በተስፋ እንፀናለን:: በአሉታዊ ገፅታዋ የምትታወቀው ሀገራችን የዓለም ሀፍረት ሳይሆን የአለም ጌጥ እስክትባል ድረስ በተስፋ እንፀናለን:: አሁን የቆምንበት የነፃነት ብልጭታ ወደ ደማቅ የሕዝባዊ ልዕልና ንጋት እስኪለወጥ ተስፋን ተሞልተን ርዕያችንን ለመጨበጥ እንተጋለን::

ፍትህ እንደቀትር ፀሐይ፣ ፍቅር እንደ ሃይለኛ ጅረት ፣ወንድማማችነት እንደ አበባ ጉንጉን፣ በኢትዮጵያ ላይ ለዘመናት ይንገሥ!