ሳይቸግርህ ነግሠህ
በእሳት ተጥደህ
ማን በደረሰልህ?
ሁሉም ተጠርጣሪ
ይፍረደን ፈጣሪ።
አንተ ቅን፥ ሕዝብ ቅን፥ ታዲያ ምን ያደርጋል?
በመካከላችሁ፥ ሴረኛው ሰልጥኗል፤
በትንሹ ምላስ፥ ሰውን እያባላ
የኢትዮጵያን ነገር፥ አሳጥቶ መላ፤
ለራሱ በሚኖር፥ ባይኖረውም ገላ
ሀገር ተቃጠለ፥ ምድራችንም ቀላ።
እኔ ፈርቻለሁ፥ እንዳይደክምህና
በነገር አዙሪት፥ ልብህ ይደማና፤
ስልጣንህን ለቀህ፥ ያሁላችሁ ብትል
አሰመሳይ ነህ ያሉህ፥ ያገቡናል ገደል።
/አንተማ/
ሀገር መምራት ሳያንስ፥ ቄሶቹን አስታርቀህ
ወንጌላዊ ባዩን፥ በላይ ጥበብ መክረህ
ሙስሊሙን አንድ አርገህ፤
እስቲ እርዱኝ ብትል፥ ሀገርን እናድን
ምንም አላየንም፥ ተባለ እንጂ አሜን።
አንድ ሰው መሆንህ፥ እውነቱ ተረስቶ
የከበበህ እሾህ፥ ያለምከው ተስቶ፤
/ጉድ እኮ ነው/
በራሱ ጣራ ስር ፥ፍቅር ቤቱ የለ
ተጣልቶ ከራሱ ሌላን ያገለለ
ጣቱን ቀሰረብህ፥ ሊፈርድም ፈጠነ
የራሱን ጉድ ትቶ፥ ያንተን ጉድ መዘነ
/እየዋለ ሲያድር/
የሚወጋህ በዝቶ፥ በግልፅ በአደባባይ
ደጋፊህ በድብቅ፥ በዝምታ ሲያይ፤
የደፈረ ወዳጅ፥ ቃልን ቢሰነዝር
በውርጅብኝ ብዛት፥ ቅስሙ ሲሰባበር፤
ብቻህን እንድትቀር፥ ሴሬኛው ሲያደባ
ሁሉም ቀስ በቀስ፥ ወጥመዱ ውስጥ ገባ።
/መቼ ነገስክና/
አጉሊ መነፅር፥ ለድካምህ
ላጲስ፥ ለብርታትህ፤
ድምፅ ማጉያ፥ ለረባሹ
የነገሠው፥ ጠብ መራሹ።
ፍቅር ብለህ ሞተህ፥ ተደመሩ ብትል
ሤራና ሸር ነግሶ፥ አላገኘህ ዕድል፤
አንዱን ስትገነባ፥ ሌላኛው ይፈርሳል
ቅንነት ስትዘራ፥ አረሙ ያንቀዋል፤
ቆመን ስናሞግስ፥ ቁጭ ብለን ስንተች
አረሙ አሸነፈን፥ ስንፈራ ያንን ተምች።
አለቀ ደቀቀ፥ እንዳይሆን ነገሩ
ወጥመዱ ይሰበር፥ ይነቀል ከሥሩ፤
ኢትዮጵያችን ታምልጥ
እጃችንን አንስጥ።
ሳይቸግርህ ነግሠህ
በእሳት ተጥደህ
ሕዝብ አለ ከጎንህ።
ኢሜል፥ Z@myEthiopia.com
