የኮሮና ቫይረስ ወደ ኢትዮጵያ እንዳይገባ ልዮ ጥንቃቄ እየተደረገ ነው ተባለ

ኢትዮጵያ ነገ ዜና || የኮሮና ቫይረስ ወደ ኢትዮጵያ እንዳይገባ ባለድርሻ አካላትና የክልል መስተዳድሮች አስፈላጊውን ጥንቃቄ ሊያደርጉ እንደሚገባ የኢትዮጵያ ማኅበረሰብ ጤና ኢንስቲትዩት አስታወቀ፡፡ የሕዝብ ተወካዮች ምክር ቤቶች የሴቶች ወጣቶችና ማኅበራዊ ጉዳዮችቋሚ ኮሚቴ የኢንስቲትዩቱን የድንገተኛ አደጋዎች ምላሽ ማስተባበሪያ ማዕከልን ጎብኝተዋል፡፡

በጉብኝቱ ወቅት የኢንስቲትዩቱ ዋና ዳይሬክተር ዶክተር ኤባ አባተ በሽታው ከጉንፋን ቫይረስ ጋር ተመሳሳይነት ያለው ቢሆንም በ14 ቀናት ውስጥ ሳል፣ ንጥሻ፣ የትንፋሽ ማጠርና የጉሮሮ ሕመም ምልክቶች የሚያሳይ ሲሆን ይህም በሽታው በፍጥነት አንዲዛመት ያደርጋል ሲሉ ለጎብኚዎቹ አስረድተዋል፡፡

ዳይሬክተሩና አያይዘውም ቦሌ ጨፌ ኢቦላ ማዕከል፣ የካ ኮተቤ አጠቃላይ ሆስፒታልና ቅዱስ ጳውሎስ ስፔሻላይዝድ ሆስፒታልአገልግሎት ለመስጠት ቅድመ ዝግጅት ያጠናቀቁ መሆናቸውን ጠቁመው፤ ነገር ግን በሁሉም የአገሪቱ  ክፍል የመሸፈን አገልግሎት ሊኖር እንደሚገባ አሳስበዋል፡፡

ቫይረሱ ወደ አገር እንዳይገባ ከምክትል ጠቅላይ ሚኒስትር ጀምሮ የሚመለከታቸው አካላት እና ከ150 በላይ ባለሙያዎች ያካተተድንገተኛ ማዕከል በቅንጅት እየሠሩ መሆኑ ተገልጿል፡፡ ሆኖም አንዳንድ ከቻይና ወደ ሀገር ውስጥ የሚገቡ መንገደኞች ለምርመራ ፈቃደኛ ባመሆናቸው የፀጥታው ኃይል ድጋፍ ሊያደርግ እንደሚገባም ዶክተር ኤባ አባተ ተናግረዋል፡፡