ኢትዮጵያ ለኮሮናቫይረስ የሚሆን መድሃኒት የማግኘት ሙከራ ጉዳይ እያነጋገረ ነው 

ኢትዮጵያ ነገ ዜና || የኮሮናቫይረስን ለማከም የሚያስችል መድሃኒት ተደጋጋሚ የቤተ ሙከራ ሞዴሊንግ መሰረታዊ የምርምር ሂደትን በስኬት ማለፉን የሳይንስና ኢኖቬሽን ቴክኖሎጂ ሚኒሰቴር ትላንት ይፋ መደረጉ ይታወቃል። 

ይህንን አስመልክቶ በተለያዩ ግለሰቦችና ተቋማት ውግዘት እያስተናገደ ያለው ሚኒስቴር መስሪያ ቤቱ መድሃኒቱን በተመለከተ በከፍተኛ የመንግሥት ባለስልጣናት አማካይነት ትናንት የወጣው መረጃ ላይ ተፈጠሩ ያላቸውን “ብዥታዎች” ለማብራራት ዛሬ መግለጫ አውጥቷል። መግለጫው እንዳመለከተው ሂደቱ በሳይንሳዊ ምርምር የተደገፈ አገር በቀል እውቀት ከዘመናዊ ሳይንስ ጋር የተቀናጀ ሥራ ነው ብሏል።

ምርምሩ የተጀመረው የኮሮናቫይረስ በዓለም ላይ መከሰቱ ከተሰማ ጊዜ አንስቶ መሆኑን በማመልከት፤ ሥራው በአገር ውስጥና ከአገር ውጪ ከሚገኙ ትውልደ ኢትዮጵያዊያን ጋር በመሆን ሲካሄድ የቆየ እንደሆነ ነው ያመለከተው።

በዚህም መሰረት መድሃኒቱ ላይ የመጀመሪያ ደረጃ ምርምር ሂደትን አልፎ በቀጣይ በእንስሳት ላይና ክሊኒካል ፍተሻ ወደ ማድረግ ሥራ እንዲሸጋገር ተደርጓል ብሏል፤ ሚኒስቴሩ።

ጨምሮም ጉዳዩ የሚመለከታቸው የመንግሥት አካላት፣ ከባህል ሃኪሞችና ከህክምና ተመራማሪዎች ጋር በመሆን የኮሮናቫይረስን ( ኮቪድ -19) ለማከም የሚያስችል መርዛማነት የሌለውና አዋጭነቱ የተረጋገጠ መድሃኒት ጥቅም ላይ ለማዋል በመስራት ላይ እንደሚገኙ አብራርቷል።

ይህንን በተመለከተ በትናንትናው ዕለት የወጣው ዜና መነጋገሪያ ከመሆን አልፎ በርካታ ጥያቄዎችና ትችቶችም ከተለያዩ ወገኖች በመሰንዘሩ ነው ሚኒስቴሩ በዛሬው ዕለት ተጨማሪ ማብራሪያ ለመስጠት የተገደደው።

ሚኒስቴሩ ሲያጠቃልልም የምርምሩን ሂደት በተመለከተ ሌሎች ተጨማሪ መረጃዎችን በቀጣይ እንደሚገልጽ አሳውቋል።