የዮናይትድ ኪንግደሙ ኩባንያ ያገኘው የኮሮና ቫይረስ መድኃኒት ለታማሚዎች እንዲሰጥ ሊጠይቅ ነው

ፈር ቀዳጅ ነው  የተባለውና በኩባንያው በተደረገው  ክሊኒካል ሙከራ መሠረት፤ በኮቪድ-19 ተይዘው በሆስፒታል የሚገኙና የኩባንያው የምርምር ውጤት የሆነውን ሕክምና የሚያገኙ ታማሚዎች ወደ ጽኑ ሕሙማን ክፍል የመግባት እድላቸውን በእጅጉ ይቀንሳል የሚል ተስፋን ፈንጥቋል።

 ሳውዝሃምፕተን የሚገኘው የባዮቴክ ኩባንያ የሆነው ሰይን ኤርጄን፤ ባካሄዳው በዚህ ሙከራ ላይ ሰውነታችን ኢንፌክሽን ሲያጋጥመው የሚያመርተውን ኢንተርፌርኖ የተሰኘ ፕሮቲን መጠቀሙን መረጃዎች ያሳያሉ።

ፕሮቲኑ የሰዎችን የበሽታ መከላከል አቅምን ከፍ ያደርጋል በሚል በኮሮናቫይረስ የተያዙ ሰዎች ፕሮቲኑን ወደ ውስጥ እንዲተነፍሱት በማድረግ ፕሮቲኑ ወደ ሳምባቸው እንዲገባ የተደረገላቸው ሲሆን፤ ከክሊኒካል ሙከራው በኋላ የተገኘው ውጤት በኮቪድ-19 ተይዘው ወደ ሆስፒታል እንዲገቡ ከተደረጉ ሰዎች 79 በመቶው ውጤቱ ቬንትሌተር ወይም የመተንፈሻ መርጃ መሣሪያ እንዳያስፈልጋቸው እንዳደረገ ተገልጿል።

አብዛኞቹ በኮሮና ቫይረስ የሚያዙ ሰዎች ይህ ሕክምና ቢደረግላቸው በሕመማቸው ምክያት የዕለት ተዕለት ሥራቸውን ማከናወን ሳያቋርጡ ከበሽታው ሊያገግሙ ያለው ኩባንያው፤ ሕክምናውን ያገኙ ሰዎች ላይ እጅግ ከፍተኛ በሆነ መልኩ የትንፋሽ ማጠር ምልክት ቀንሶ ታይቷል ሲልም ተስፋ አዘል ማረጋገጫ ሰጥቷል።

 ሕክምናውን ያገኙ ታማሚዎች በሆስፒታል የሚኖራቸው ቆይታ እንደሚቀንስ የተናገሩት ተመራማሪዎች፤

በሆስፒታል ውስጥ በአማካይ 9 ቀናት ይቆዩ የነበሩ ታማሚዎች  ይህ ሕክምና ከተደረገላቸው በኋላ የሚቆዩበት ቀናት ወደ 6 ቀናት መቀነሱንም ገልጸዋል።

ክሊኒካል ሙከራው የተካሄደው በዘጠኝ የዩናይትድ ኪንግደም ሆስፒታሎች ውስጥ በሚገኙ 101 በጎ ፍቃደኞች ላይ ነው። የተገኘው ፈር ቀዳጅ ውጤት እስካሁን ድረስ በጤና መጽሔቶች ላይ ያልታተመ ቢሆንም፣  ኩባንያው ግን ኮሮና ቫይረስ የሚያስከትለውን  በሽታን ለማከም የምርምር ሥራው አመርቂ ውጤት አስገኝቷል ሲል ገልጿል።

የሲይንኤርጂን ዋና ሥራ አስፈጻሚ የሆኑት ሪቻርድ ማርስዲን፤ ኩባንያቸው በቀጣይ ቀናት የምርምር ውጤታቸውን ለሚመለከታቸው የአገሪቱ የጤና ሓላፊዎችና ለዓለም ዐቀፍ የጤና ተቋማት እንደሚያጋራ፣ በቀጣይም በክሊኒካል ሙከራው የተገኘው ውጤት ለሰው ልጆች ማከሚያነት እንዲውል ጥያቄ እንደሚያቀርቡም ከወዲሁ ይታወቅልን ሲሉ ተደምጠዋል።