ኢትዮጵያ ነገ ዜና፡– ዛሬ ከቀኑ 6 ሰዓት ከ25 ደቂቃ ላይ በቦሌ ክፍለ ከተማ ወረዳ 8 ሲ ኤም ሲ በደረሰ የእሳት አደጋ 12 ሚሊዮን 856 ሺ 620 ብር የሚገመት ንብረት መውደሙን የአዲስ አበባ እሳትና አደጋ ሥራ አመራር ኮሚሽን ገለጸ።
አደጋው ከዚህ በላይም ጉዳት ሊያደረስ ይችል እንደነበር የዐይን እማኞች ተናግረዋል ያሉት የኮሚሽኑ የሔዝብ ግንኙነት ቡድን መሪ አቶ ጉልላት ጌታነህ፤ ከ 48 ሚሊዮን ብር በላይ የሚገመት ንብረትን ከውድመት መታደግ መቻሉንም አስታውቀዋል፡፡
አደጋውን ለመቆጣጠር አራት ሰዐት ከ15 ደቂቃ መፍጀቱን ያነሱት አቶ ጉልላት አምስት የአደጋ ሠራተኞች በሥራ ላይ ሳሉ ቀላል የመቁሰል አደጋ እንደደረሰባቸውና ከ70 በላይ የአደጋ መከላከል ሠራተኞችና ከ14 በላይ ከባድ ተሽከርካሪዎች ጥቅም ላይ መዋላቸውንም መረዳት ተችሏል።
