ኢትዮጵያዊቷ ሎዛ አበራ በአውሮፓዋ ማልታ የዓመቱ ኮከብ ተጫዋች ሆና ተመረጠች

ከደቡብ ኢትዮጵያ ክልል ዱራሜ ከተማ የተገኘችው ወጣቷ የኳስ ፈርጥ በአጭር ጊዜ ውስጥ በሀገር ውስጥም ሆነ በውጭው ዓለም ስኬታማ መሆን የቻለች ኢትዮጵያዊት ኮከብ ነች።

ሎዛ አበራ የእግር ኳስ ሕይወቷን ከፍ ባደረገችበት የደደቢት ሴቶች እግር ኳስ ቡድንን በተቀላቀለችበት የመጀመሪያው ዓመት ለሉሲዎቹ (የሴቶች ብሔራዊ ቡድን) ለዋናው ቡድንም፣ ከ20 ዓመት በታች ብሔራዊ ቡድንም በመጫወት ሁለቱም ላይ ኮከብ ግብ አግቢና ኮከብ ተጫዋች ሆና ለማጠናቀቅ ችላለች።

በብሔራዊ ቡድን ውስጥ ያሳየችውን ወጥ የሆነ አቋም ተከትሎ ባለፈው ዓመት በአውሮፓዊቷ ማልታ የሴቶች ሊግ በመጫወት የመጀመሪያዋ ኢትዮጵያዊት ፕሮፌሽል ተጫዋች ለመሆን የበቃችው ሎዛ አበራ ትናንት ምሽት ይፋ በተደረገው መረጃ መሠረት የሊጉ የዓመቱ ኮከብ ተጫዋች ሆናለች።