በአፍሪካ ሕብረት በኩል ሦስት ታዋቂ ግለሰቦች ለሽምግልና ቢለኩም ዶ/ር ዐበይ ድርድር አይኖርም አሉ

ሲሪል ራማፎሳ ሦስት ታዋቂ አፍሪካዉያንን በኢትዮጵያ ውስጥ በተከሰተው ግጭት ዙሪያ እንዲያሸማግሉ የአፍሪካ ሕብረት ልዩ መልዕክተኛ አድርገው እንደሰየሙ በትዊተር ገጻቸው ላይ ቢያሰፍሩም፤ ጠቅላይ ሚኒስትር ዐቢይ አሕመድ የልዑካን ቡድኑን ተቀብለው ከማናገር ውጪ ወደ ድርድር እንደማይገቡ ከጠቅላይ ሚኒስትር ጽ/ቤት የተገኘው መረጃ ያሳያል።

ህወሓትን ከፌደራል መንግሥቱ ጋር አሸማግላለሁ የሚሉት ፕሬዝዳንት ራማፎሳ፤ ጉዳዮን ወደ ደቡብ አፍሪካ ለተጓዙት የኢትዮጵያ ፕሬዝዳንት ሳህለወርቅ ዘውዴ እንደገለጹላቸውና መልዕክተኞቹ ወደ ኢትዮጵያ በመጓዝ ግጭቱ መፍትኄ በሚያገኝበት መንገድ ላይ ድጋፍ ያደርጋሉ የሚል መረጃዎች በመውጣት ላይ ናቸው።

ወደ ኢትዮጵያ የተለኩትና የተመረጡት ልዩ መልዕክተኞቹ የቀድሞው የሞዛምቢክ ፕሬዝዳንት ዮአኪም ቺሳኖ፣ የቀድሞዋ የላይቤሪያ ፕሬዝዳንት ኤለን ሰርሊፍ ጆንሰንና የደቡብ አፍሪካ የቀድሞ ፕሬዝደንት የነበሩት ጋሌማ ሞትላንቴ መሆናቸውም ታውቋል።