ህወሓት ባህር ዳር ከተማ ላይ ለሦስተኛ ጊዜ ዛሬ ማለዳ የሮኬት ጥቃት ፈጸመ

 ኢትዮጵያ ነገ ዜና፡– ዛሬ (ሰኞ) ንጋት 12፡20 ላይ በባሕር ዳር ከተማ ላይ ሮኬት መተኮሱ ተሰማ። ህወሓት ባህርዳር ላይ መሰል የጥቃት ሙከራ ሲያደርግ በሁለት ሳምንት ውስጥ ለሦስተኛ ጊዜ ነው።

ጉዳዮን አስመልክቶ ቢቢሲ ያነጋገራቸው አንድ ነዋሪ ሦስት ፍንዳታ መስማታቸውን ሲናገሩ ፣ ሌላኛው ነዋሪ ደግሞ ሁለት የፍንዳታ ድምጽ መስማታቸውንና ከዚህ ቀደም ከተፈጸሙት የሮኬት ጥቃቶች ጋር ተመሳሳይ ያላቸው እንደሆኑ አስረድተዋል።

በባህርዳር ያለው የቢቢሲ ሪፖርተርም ንጋት ላይ ቢያንስ ሁለት ከባድ የፍንዳታ ድምጽ በከተማዋ መሰማቱን ጠቁሞ ይህ ዜና እስከተጠናቀረበት ረፋድ ሰዐት ድረስ ፍንዳታውን አስመልክቶ የአማራ ክልል መንግሥትም ሆነ የክልሉ መገናኛ ብዙኃን በይፋ የገለጹት ነገር የለም።