ኢትዮጵያ ነገ ዜና፡– የኢትዮጵያ የሃይማኖት ተቋማት ጉባኤ ከመጪው አርብ ጀምሮ ሃገር አቀፍ የጸሎትና ምህላ መርሃ ግብር ሊጀመር መሆኑን በገለፀበት የዛ መግለጫው እንዳስታወቀው፣ ወቅታዊ ሀገራዊ ጉዳይን፣ የኮቪድ 19 ወረርሽኝ መስፋፋትን፣ መጪው ሀገራዊ ምርጫንና ሌሎች ሀገራዊ ጉዳዮችን ምክንያት በማድረግ ሃገር አቀፍ የጸሎትና ምህላ መርሃ ግብሩ ማስፈለጉ የተመለከተ ሲሆን፣ የጉባኤው ጠቅላይ ፀሀፊ የሆኑት ሊቀ ትጉሀን ቀሲስ ታጋይ ታደለም “ፀሎትና ምህላ የሀይማኖተኞች ችግር መፍቻ ነው፤ ሀገራችንም ከመቼውም ጊዜ በላይ ወደ ፈጣሪ በመቅረበ በይቅርታና በንስሃ የሚመላለሱ ልጆች ያስፈልጓታል” ሲሉ ተናግረዋል።
ሚያዝያ 7 ቀን 2013 ዓ.ም ከቀኑ 9 ሰዓት በኢትዮጵያ የሃይማኖት ተቋማት ጉባኤ የበላይ ጠባቂ የጸሎትና ምህላ መርሃ ግብሩ የሚታወጅ መሆኑ፣ ከሚያዚያ 8 ቀን ጀምሮም ለተከታታይ ሰባት ቀናት እንደሚቆይና በመርሀ ግብሩ የመንግስት አመራሮች፣ ተፎካካሪ የፖለቲካ ፓርቲዎች፣ የሀገር ሽማግሌዎች እንዲሁም ታዋቂ ግለሰቦች ይሳተፋሉ ተብሎ እንደሚጠበቅም በመግለጫው ተገልጿል።
