ኢትዮጵያ ነገ ዜና:- የ2013 ዓ.ም ቤት ኪንግ ኢትዮጵያ ፕርሚየር ሊግ መሪ የሆነው ፋሲል ከነማ አሸናፊ መሆኑን አረጋግጧል፡፡ አፄዎቹ ከተከታያቸው ኢትዮጵያ ቡና ከወላይታ ዲቻ ጋር አቻ መውጣታቸውን ተከትሎ ከወዲሁ አሸናፊ መሆናቸውን አረጋግጠዋል።
ፋሲል ከነማ በቀጣይ ሳምንት ግንቦት 8/2013 ዓ.ም ከድሬደዋ ከተማ ጋር ከሚያደርጉት ጨዋታ መጠናቀቅ በኋላ ዋንጫውን በይፋ ይረከባል።
የአማራ ክልል ርእሰ መሥተዳድር አገኘሁ ተሻገር ፋሲል ከነማ የኢትዮጵያ ፕሪሚየር ሊግ አሸናፊ በመሆኑ የተሰማቸውን ደስታ ገለፀዋል፡፡
ርእሰ መሥተዳድሩ በማኅበራዊ ትስስር ገጻቸው ባስተላለፉት መልዕክት “የፋሲል ከነማ ስፖርት ክለብ በኢትዮጵያ ቤትኪንግ ፕሪሚየር ሊግ ሻምፕዮን በመሆኑ የተሰማኝ ደስታ በእኔና በክልሉ መንግሥትና ሕዝብ ስም እገልጻለሁ” ብለዋል፡፡
“ለክለቡ ተጫዋቾች፣ ደጋፊዎች እንዲሁም ለመላው የክልላችን ሕዝቦች እንኳን ደስ አላችሁ፤ እንኳን ደስ አለን” ነው ያሉት በገጻቸው፡፡
ለክልሉ ሁለንተናዊ የስፓርት እድገት የክልሉ መንግሥት የሚያደርገውን ድጋፍ አጠናክሮ እንደሚቀጥልም በመልዕክታቸው ገልጸዋል፡፡
