ኢትዮጵያ ነገ ዜና፡– 19 ሺህ 739 ተተኳሽ ጥይቶችን በባለ ሶስት እግር ባጃጅ ተሽከርካሪ ጭነው ወደ ባሕር ዳር ሊያስገቡ የሞከሩ ሁለት ግለሰቦችን በቁጥጥር ስር ማዋሉን በጉምሩክ ኮሚሽን የባሕር ዳር ቅርንጫፍ ጽሕፈት ቤት አስታውቋል።
የቅርንጫፍ ጽሕፈት ቤቱ ሥራ አስኪያጅ አቶ አለነ መሀሪ እንደገለጹት፣ ግለሰቦቹ የቱርክ ሰራሽ ሽጉጥ ጥይቶቹን ከምዕራብ ጎንደር ዞን ቋራ ወረዳ ከደለጎ ከተማ ወደ ባሕር ዳር ለማስገባት ሲሞክሩ ትናንት ከቀኑ ዘጠኝ ሰዓት በቁጥጥር ሥር ውለዋል።
ግለሰቦቹ የሰሌዳ ቁጥሩ ኮድ 1-43622 አ.ማ በሆነ በባለ ሶስት እግር ባጃጅ ተሽከርካሪ ጭነው ወደ ባህርዳር ለማስገባት ሲሞክሩ በሻውራ ጉምሩክ ሰራተኞችና በፌደራል ፖሊስ ትብብር በተደረገ የኬላ ፍተሻ መያዛቸውን ተናግረዋል።
ተጠርጣሪ ግለሰቦቹ ለፖሊስ ተላልፈው ተሰጥተው ጉዳዩ እንዲጣራ እየተደረገ መሆኑን ያመለከቱት አቶ አለነ መሀሪ “ሕገ ወጥ እንቅስቃሴ የማኅበረሰቡንም ሆነ የሀገሪቱን ሰላም የሚጎዳ በመሆኑ ሕብረተሰቡ መሰል ወንጀሎች ሲያጋጥሙት ለሚመለከተው አካል በማሳወቅ ኃላፊነቱን እንዲወጣ” ሲሉ ጥሪ አቅርበዋል።
