ጋዜጠኛ ታምራት ነገራ ፍርድ ቤት መቅረቡ ተነገረ

ኢትዮጵያ ነገ ዜና ጋዜጠኛ ታምራት ፍርድ ቤት የቀረበው ያለጠበቃ መሆኑ የተገለጸ ሲሆን የምርመራ ጊዜ ተጠይቆበታል ተብሏል።

የተራራ ኔትዎርክ ዋና አዘጋጅ ጋዜጠኛ ታምራት ነገራ ከአዲስአበባ ፖሊስ ተላልፎ በኦሮሚያ ክልል ገለን ከተማ ፖሊስ መምሪያ እንደታሰረ ታውቋል።

ጋዜጠኛው ላለፉት 7 ቀናት የት እንዳለ ሳይታወቅ ቆይቶ በትናንትናው ዕለት ፍርድ ቤት መቅረቡንም ባለቤቱ ወይዘሮ ሰላም በላይ አስታውቀዋል ።

በፊንፊኔ ዙሪያ የገላን ከተማ ፍርድ ቤት ለጋዜጠኛ ታምራት ነገራ የ14 ቀን ቀጠሮ እንደሰጠውም ተነግሯል ።

ባሳለፍነው ሳምንት ታህሳስ 01/2014 ዓ.ም ከጠዋቱ 4:30 ገደማ ወደ ሶስተኛ ፖሊስ ጣቢያ የተወሰደ ሲሆን ላለፉት 7 ቀናት የት እንደታሰረ ቤተሰቦቹ ማወቅ እንዳልቻሉ ተናግረው ነበር።

ጋዜጠኛ ታምራት በ አሁን ሰዓት በገላን ከተማ ኦሮሚያ ፖሊስ መምሪያ ውስጥ እንደሚገኝ ባለቤቱ ወ/ሮ ሰላም በላይ ተናግረዋል።

ከፌደራል ፖሊስ ወደ ኦሮሚያ ፖሊስ እንደተዛወረም ታውቋል።

በ ፍርድ ቤት ቆይታውም አቃቢ ህግ በጠየቀው የ 14ቀን የጊዜ ቀጠሮ መሰረት የተፈቀደለት መሆኑን እንዲሁም የታምራት ቤተሰቦች ብቻ ለጥየቃ ፍቃድ እንደተሰጣቸው ባለቤቱ ወ/ሮ ሰላም ተናግረዋል።