ኢትዮጵያ ነገ ዜና || የአዲስ አበባ ከተማ ምክትል ከንቲባ ኢንጂነር ታከለ ኡማ አዲስ አበባ ውስጥ በተለያየ ስፍራ ከሚሠሩ የታክሲ ተራ አስከባሪዎች ጋር ተወያዮ።
በውይይታቸው ላይ በቀጣይ የአዲስ አበባ ከተማ ታክሲ ተራ አስከባሪዎች ከከተማ አስተዳደሩ ጋር ተቀራርበው በሚሠሩባቸው መንገዶች ዙሪያ መክረዋል። የታክሲ ተራ አስከባሪዎቹ በትራንስፖርት አሰጣጥ ላይ፣ በታሪፍና ስምሪት፣ ባለው የፓርኪንግ ችግር እንዲሁም በሥራ ቦታ ላይ በሚታዮ ተጨማሪ ችግሮች ዙሪያ ያሏቸውን ጥያቄዎች ለከንቲባው አቅርበዋል።
የአቅመ ደካሞችን ቤት በማደስ፣ የደም ልገሳ በማድረግ፣ በክረምት ችግኝ በመትከል፣ በጽዳት ዘመቻ ላይ በመሳተፍ እንዲሁም የአካባቢያቸውን ሠላም በመጠበቅ ረገድ የታክሲ ተራ አስከባሪዎቹ እያደረጉት ላለው ተሳትፎ ኢንጂነር ታከለ ምስጋና ይገባችኋል ብለዋል።
የታክሲ ተራ አስከባሪዎቹ ከየትኛውም አካል በላይ ያልተገደበ አገልግሎት ለከተማዋ ነዋሪዎች እየሰጡ ነው ያሉት ታከለ ኡማ ፤ በከተማዋ ውስጥ በሚካሄዱ የልማት ሥራዎች ላይ እያበረከቱት ላለው አስተዋጽኦ ያላቸውን አድናቆታቸውን ከመግለጻቸው ባሻገር፤ በቀጣይ የተለያዩ መዋቅሮችንና አሠራሮችን በመዘርጋት የታክሲ ተራ አስከባሪዎች ያነሷቸውን ችግሮች ለመቅረፍ ከፍተኛ ጥረት እንደሚያደርጉ ተናግረዋል።
አዲስ አበባን የመለወጥ ጉዞ የጀመርነው በዝቅተኛ የኑሮ ደረጃ ላይ ላሉ ነዎሪዎች ትኩረት በመስጠት ነው ያሉት ኢንጂነር ታከለ ኡማ በከተማዋ ውስጥ አንድም የማይመለስ የነዋሪዎች ጥያቄ አይኖርም ሲሉ ተደምጠዋል። የታከለ ኡማ ሰሞነኛ እንቅስቃሴና የነዋሪዎች ውይይት በቀጣዮ አገራዊ ምርጫ የኢዜማ ወዳጅ ነው የሚባለውን የአዲስ አበባን ብዙኃኑን ሕዝብ ድጋፍ ለማግኘት እንደሆነ የተለያዮ የፖለቲካ ተንታኞች በመናገር ላይ ናቸው::
