ኢትዮጵያ ነገ ዜና || በአዲስ አበባ በዛሬው እለት ሦስት አዲስ ሰዎች በኮቪድ 19 ቫይረስ መያዛቸው መረጋገጡን የጤና ጥበቃ ሚኒስቴር አስታውቋል።
ሚኒስቴር መሥሪያ ቤቱ ባለፉት 24 ሰዐታት የኮሮና ቫይረስ ምርመራ ከተደረገላቸው 247 ሰዎች ውስጥ ሦስቱ በቫይረሱ መያዛቸው በምርመራ መረጋገጡን ይፋ አድርጓል።
ዛሬ ኮቪድ 19 የተገኘባቸው ሁለት ወንዶችና አንዲት ሴት ሲሆኑ ሦስቱም የውጭ ሀገር የጉዞ ታሪክ የሌላቸው የአዲስ አበባ ነዋሪዎች እንደሆኑም ታውቋል።
በተለይ ሁለቱ ወንዶች ቫይረሱ ካለበት ሰው ስለነበራቸው ንክኪ የሚያረጋግጥ ምንም ዓይነት መረጃ አለመገኘቱ የቫይረሱ ስርጭት ከቀጥታ ንክኪ ወደ ሠፊው የኅብረተሰብ ክፍል ተዛውሯል የሚል ስጋትን በከፍተኛ ሁኔታ ፈጥሯል።
ኢትዮጵያ እስካሁን ድረስ 74 ሰዎች በቫይረሱ የተያዙ ሲሆን በድምሩ 14 ሰዎች ከሕመማቸው ማገገማቸው ተነግሯል።
