ኢትዮጵያ ነገ ዜና፡– እየተስፋፋ የመጣውን ሕገ ወጥ የጦር መሳሪያ ንግድና ዝውውር ተከትሎ በሰራባ ጉምሩክ መቆጣጠሪያ ጣቢያ በተደረገ ፍተሻ፣ 230 ህገወጥ የቱርክ ሽጉጥ ተይዟል ተባለ።
የጦር መሳሪያው ከሼህዲ ወደ አዲስ አበባ ሲጓዝ የነበረ ኒሳን ፓትሮል ሲንግል ሚኒካፕ በሆነ የግል መኪና ላይ በትናትናው ዕለት በሰራባ ጉምሩክ መቆጣጠሪያ ጣቢያ በተደረገ ፍተሻ ነው ሊያዝ የቻለው።
ከዚህ ጋር ተያይዞም አንድ ተጠርጣሪ የህገ ወጥ የጦር መሳሪያውን በማዘዋወር ተጠርጥሮ በቁጥጥር ስር ውሎ ምርመራ እየተካሄደበት እንደሚገኝ ዘገባዎች አስረድተዋል።
ህገወጥ የጦር መሳሪያ ዝውውሩ በጉምሩክ ፍተሻ በተደጋጋሚ እየተገኘ በመሆኑና ከፍተኛ የጦር መሳሪያ ወደ ክልሉ እየገባ በመሆኑ ይሄን ህገወጥ የጦር መሳሪያ ዝውውርም በጉምሩክ ፍተሻ ብቻ መቆጣጠር ስለማይቻል በየደረጃው ያለው የመንግስት መዋቅርና ማኅበረሰብ ተሳትፎ ያስፈልጋል ተብሏል።
