ኢትዮጵያ ነገ ዜና፡– ቫይረስ የላቦራቶሪ ምርመራ የነጻ ውጤት ለተመርማሪዎች በእጅ ስልካቸው አማካይነት በጽሑፍ መልዕክት እንዲደርሳቸው የሚያስችል ሥራ ተጀመረ።
የኢትዮጵያ የሕብረተስብ ጤና ኢንስቲትዩ፣ የሕብረተሰብ ጤና ድንገተኛ አደጋ ማስተባበሪያ ማዕከል የዲጂታይዜሺን የሥራ ክፍል፣ የኮሮና ቫይረስ የላቦራቶሪ ምርመራ ውጤትን በተቀላጠፈ መንገድ ለተመርማሪዎች ተደራሽ ለማድረግ ውጤቱ በእጅ ስልክ እንዲደርሳቸው እያደረግሁ ነው ብሏል።
የላቦራቶሪ መረጃ ሥርዓቱን ከማሳደግ አኳያ በወረቀት ይደረጉ የነበሩትን አብዛኞቹን መረጃዎች በኤሌክትሮኒክስ መለዋወጥ ተጀምሯል ያሉት የሥራ ክፍሉ ሓላፊ አቶ መስዑድ ሙሐመድ፤ በየቀኑ እና በየሳምንቱ የሚላኩ ሪፖርቶች ከወረቀት ወደ ኤሌክትሮኒክስ በማድረግ ሥራዎችን የተቀላጠፉና በፍጥነት ተደራሽ እንዲሆኑ ማድረግ ተችሏል ብለዋል።
ከኢትዮ ቴሌኮም ጋር በመተባበር የተጀመረው አዲስ አሠራር የላብራቶሪ ናሙና የተወሰደላቸው ሰዎች የናሙና ምርመራ ውጤት ከተረጋገጠ በኋላ፣ ከሦስት ሰዐት ባልበለጠ ጊዜ ውስጥ ውጤቱን በ8335 አጭር የጽሑፍ መልዕክት እንዲደርሳቸው እየተደረገ መሆኑ ነው የተገለጸው።
ውጤቱ በትክክል መድረሱን የሚያረጋግጥ የአሠራር ዘዴ ከኢትዮ ቴሌኮም ጋር በመተባበር እየተሠራ ሲሆን፤ ኅብረተሰቡ የመረጃው ተጠቃሚ እንዲሆን ለማድረግ ባለሙያዎቹ ናሙና ሲወስዱ ለተመርማሪዎች እንዲያሳውቁ መደረጉን፣ እንዲሁም ተመርማሪዎች ትክክለኛ የስልክ ቁጥራቸውን ማስመዘገብ እንዳለባቸው ግንዛቤ ማስጨበጫ እየተሠራ መሆኑም ታውቋል።
ከላቦራቶሪ በተጨማሪ የጤና ተቋማት ባለሙያዎች በተቋማቸው በሚመረመሩ ታካሚዎች ላይ የሚያዩትን የኮሮና ቫይረስ ምልክት በ8335 ወይም በሞባይል መተግበሪያ (አፕሊኬሽን) በመጠቀም በጽሑፍ ለኢንስቲትዩቱ የሚልኩበትን ሂደት እና ራስን ለይቶ ሕክምና (ውሸባ) እና እንክብካቤ፣ እንዲሁም የተለየዩ የኮሮና ሎጂስቲክስ ልውውጥን በኤሌክትሮኒክስ የማድረግ ሥራዎችም በዚህ መንገድ እየየተገበሩ ነው ተብሏል።
