ኢትዮጵያ ነገ ዜና || በአዲስ አበባ ከተማ በቂርቆስ ክፍለ ከተማ በአንድ ንግድ ቤት ውስጥ የተከማቸ ከ2 ነጥብ 6 ሚሊየን ብር በላይ በህዝብ ጥቆማ መያዙን የአዲስ አበባ ፖሊስ ኮሚሽን ገለፀ።
በቂርቆስ ክፍለከተማ ወረዳ 9 ደምበል ተብሎ በሚጠራው አካባቢ በአንድ የንግድ ቤት ውስጥ የተከማቸ ገንዘብ እንዳለ የሚያሳይ ጥቆማ መምጣቱን ተከትሎ ገንዘቡ ሊያዝ መቻሉን የደምበል አካባቢ ፖሊስ ጣቢያ የወንጀል ምርመራ ማስተባበሪያ ሓላፊ ኢንስፔክተር ሰለሞን ደጀኔ ይፋ አድርገዋል።
ጥቆማው የደረሰው ፖሊስም የፍርድ ቤት ትዕዛዝ በማውጣት በንግድ ቤቱ ላይ ባደረገው ብርበራ ብሔራዊ ባንክ ካስቀመጠው መመሪያ ውጭ ተከማችቶ የተገኘ 2 ሚሊየን 631 ሺኅ 735 አዲሱን እና ነባሩን የኢትዮጵያ ብር ሊይዝ ችሏል።
መንግሥት እና የፀጥታ አካላት የሀገርን ኢኮኖሚ ለማረጋጋት የሚያከናውኑትን በሕገ ወጦች ላይ እርምጃ የመውሰድ ተግባር በመደገፍ ኅብረተሰቡ የጀመረውን ትብብር አጠናክሮ እንዲቀጥል ኢንስፔክተር ሰለሞን ደጀኔ መልዕክት አስተላልፈዋል።
