ኢትዮጵያ ነገ ዜና || ትውልደ ኢትዮጵያዊው ታዳጊ አዶንያ ወንድወሰን ለማንችስተር ዮናይትድ ለመጫወት መፈረሙ ተሰማ።
በዜግነት እንግሊዛዊ የሆነው የ16 ዓመቱ አዶናይ፣ ዓለም ላይ ስመ ገናና ከሆነው፣ በርካታ የእንግሊዝ ፕሪምየር ሊግና የቻምፒዮንስ ሊግ ዋንጫዎችን ካነሳው ማንችስተር ዮናይትድ ጋር ለሦስት ዓመታት የሚያቆየውን ውል ተፈራርሟል፡፡
በቴክኒክ ክህሎቱ የተዋጣለት ነው የተባለው ትውልደ ኢትዮጵያዊው አዶናይ፤ በግራ መስመር ቦታ ላይ የሚጫወት ሲሆን ታዳጊው ከሚያሳየው ተስፋ ሰጪ እንቅስቃሴ የተነሳ በተለያዩ ክለቦች ውስጥ ትኩረት አግኝቶ እንደነበርም ተሰምቷል።
ቀደም ሲል የጀርመንና የአሜሪካ ጥምር ዜግነት ያለው ትውልደ ኢትዮጵያዊው ጌዲዮን ዘላለም በአርሴን ቬንገር ይሰለጥን ለነበረው የእንግሊዙ አርሰናል ክለብ ፈርሞ እንደነበር ይታወሳል።
