ኢትዮጵያ ነገ ዜና፡– የኢትዮጵያ ኦርቶዶክስ ተዋሕዶ ቤተክርስቲያን የቅዱስ ሲኖዶስ አባል፣ የቅድስት ሥላሴ ዩኒቨርስቲ እና የመንበረ ጸባዖት ቅድስት ሥላሴ ካቴድራል የበላይ ጠባቂ ብፁዕ አቡነ ጢሞቴዎስ (ዶ/ር) ከዚህ ዓለም በሞት ተለይተዋል።
በ1930 ዓ.ም ግንቦት ወር በትግራይ ክልል ብዘት ወረዳ የተወለዱት ብፁዕነታቸው በተወለዱ በ83 ዓመታቸው ከዚህ ዓለም ድካም ማረፋቸውን የገለፀው የቅዱስ ሲኖዶስ ጽ/ቤት፣ ቅዱስ ሲኖዶስ በወሰነው መሠረት የብፁዕነታቸው የቀብር ሥነ ሥርዓት ነገ መጋቢት መጋቢት 29 ቀን 2013 ዓ.ም ከቅዳሴ በኀላ በመንበረ ጸባዖት ቅድስት ሥላሴ ካቴድራል ቅዱሳን ፓትርያርኮች በተገኙበት እንደሚፈፀም አስታውቋል፡፡
ዛሬ መጋቢት 28 ቀን 2013 ዓ.ም በመንበረ ጸባዖት ቅድስት ሥላሴ ካቴድራል ብፁዕ ወቅዱስ አቡነ ማትያስ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወእጨጌ ዘመንበረ ተክለሃይማኖት ብፁአን ሊቃነ ጳጳሳት በተገኙበት ጸሎተ ፍትሐት መከናወኑንም ለማወቅ ተችሏል።
