/ኢትዮጵያ ነገ ዜና/፡- የቀድሞው የአንድነት ፓርቲ ከፍተኛ አመራር የነበሩት አቶ አንዷለም አራጌ የመኪና ሽልማት ተበረከተላቸው።
በግፍ የእድሜ ልክ ፍርደኛ የነበሩት አቶ አንዷለም አራጌ ከሰባት ዓመታት እስር በሗላ ባለፈው የካቲት ወር የተፈቱ ሲሆን በቀድሞ በትግል አጋሮቻቸውና በአድናቂዎቻቸው ዛሬ የመኪና ሽልማት ተበርክቶላቸዋል።
ለአቶ አንዷለም ያሪስ የተባለች የ450 ሺህ ዋጋ ያላት መኪና ከዶክተር ሀይሉ አርያ እጅ ተቀብለዋል። ሽልማቱም አቶ አንዷለም በሰላማዊ ትግሉ ለከፈሉት መስዋዕትነት ታሳቢ በማድረግ ነው ተብሏል።
ለአቶ አንዷለም በተዘጋጀው የምስጋና ፕሮግራም ላይ ጋዜጠኛ ተመስገን ደሳለኝ ለታዳሚው በሙሉ የአንገት ስካርፍ ሸልሟል። በተጨማሪም የፕሮግራሙ አዘጋጆች ለአበበ ቀስቶ እናት የሀገር ባሕል ልብስና ለናትናኤል መኮንን ባለቤት የአንገት ሐብል እንደተበረከተላቸው ታውቋል።
