ጉዳዩ፦ ጠቅላይ ሚኒስትር ዓብይ አሕመድ አሊን በዳላስ 2018 ዝግጅት ላይ መጋበዝን ይመለከታል።
ፌዴሬሽኑ ለ35 ዓመታት ኢትዮጵያውያንን በሰሜን አሜርካ በማቀራረብና የሀገራዊ አንድነትን መንፈስ በስፓርትና በባህል ፌስቲቫል በማክበር ያሳየው ታታሪነትና ጽናት በዲያስፓራ አሉ ከሚባሉ የኢትዮጵያውያን ተቋማት አንዱ አድርጎታል። በነዚህ 35 ዓመታት ልዩ ልዩ ፈተናዎችን ያለፈው ፌደሬሽናችን የዲያስፓራ ብቻ ሳይሆን ለሀገራችን ጭምር ትልቅ ኩራት ነው።
በሀገራችን ውስጥ ባለፉት ሶስት አመታት ወጣቶች ሲገደሉ ፣ ሲቆስሉ ፣ በሺዎች ሲታሰሩና ሲሰደዱ በብዙ ሀዘን ፡ ስጋትና ቁጭት ውስጥ ያላለፈ የዲያስፓራ ማህበረሰብ አባል የለም! በማህበራዊ ሚዲያ ላይ ያየናቸው በግፍ የተገደሉ ወጣቶች ፎቶግራፎችን በህሊናችን ላይ ታትሟል።
ወጣቱ በከፈለው ክቡር መስዋዕትነት ምክንያት ባለፉት ጥቂት ወራት በሀገራችን አንጻራዊ የሆነ የለውጥ ተስፋ አንሰራርቷል። በተለይም አዲሱ የኢትዮጵያ ጠቅላይ ሚኒስትር ዶ/ር ዓብይ አሕመድ አሊ የሰላም ፣ የዕርቅና የአገራዊ አንድነት ጥሪ በሀገር ውስጥም ሆነ በዲያስፕራ የምንኖር ኢትዮጵያውያንን ትኩረት ስቧል።
የእነ ጋዜጠኛ እስክንድ ነጋ ፣ አቶ አንዷለም አራጌ ፣ ኡስታዝ አመዲን ጀበል ፣ ዶ/ር መረራ ጉዲና ፣ አቶ በቀለ ገርባ ፣ ወ/ት ንግስት ይርጋ ፣ እንዲሁም ይፈታሉ ተብሎ በመንግስት ሚዲያዎች የተነገረውና የሚጠበቀውን የታጋይ አቶ አንዳርጋቸው ጽጌ እና ሌሎች በአስር በሺዎች የሚቆጠሩ ዜጎች መፈታት የጠ/ሚ ዓብይ አመራር ውጤት ነው።
የጠቅላይ ሚኒስትሩን የሰላም፣ የዕርቅና የአንድነት ጥሪና ተግባሮች ለማበረታታትና ኢትዮጵያውያንን መካከል የተፈጠረውን መራራቅና መከፋፈል ለማስወገድ ሲባል የፌደሬሽኑ ቦርድ ጠ/ሚ ዓብይን በ35ኛውን አመታዊ የስፓርትና የባህል ፌስቲቫል በዳላስ ቴክሳስ በእንግድነት እንዲጋብዝ በትህትና እጠይቃለሁ!
/ልጅ ተክሌ ዘብሄረ ቡልጋ/
