በቀደም እኔና አዩ እራት ለመብላት አበሻ ምግብ ቤት ቁጭ ብለናል፤ አዩ ባልንጀራየ ናት ፤ ለስድስት ወራት ያክል ብንተዋወቅም ሙሉ ስሟን አልነገረችኝም፤ ሙሉ ስሟ “ አያልነሸ” ወይም “ አያንቱ” ሊሆን ይችላል ::
ቅርብ ማዶ ካለው ጠረጴዛ ፊተለፊት ሁለት ፍቅረኛሞች ተቀምጠዋል፤ ሴቲቱ በሰውየው ትከሻ ላይ ዘንበል ብላ ታለቅሳለች ፤ ሰውየው በፈርጣማ ክንዱ አቅፎ እያባበላት ነው፤
“ልጂቱዋ ምን ሆና ነው እምትነፋረቀው?’ አልኳት አስናጋጂቱን::
“ እጮኛዋ ነገ ወደ ኢትዮጵያ ሊሄድ ነው፤ ዘመቻ” አለች አስተናጋጄ ጠረጴዛውን እያስተካከለችኝልኝ ::
“ ይገርማል! ሸገር ፤ መሀል ቦሌ ላይ የሚኖሩ ቤተሰቦችን ማየት የሚፈራ መአት ዲያስፖራ ባለበት አገር እንዲህ አይነት ቆራጥ ማየት ልብ ያሞቃል “ አለች አዩ: :
“ የጠረጴዛው ልብስ በጣም ነው የሚያምረው “ አልኩ ጨዋታ ለማስቀየስ ::
“ አንተ መች ነው እምትዘምተው?”
<ምነው፥ የእዝን ቆሎየን ለመብላት ቸኮልሽ> ልላት ፈልጌ ተውኩት ::
“ እኔኮ ባገሬ ድርሻየን ዘምቻለሁ”
“ መቸ?” ፥ አፋጠጠችኝ
“ትንሽ ቆየት አለ”
“ ባድሜ?”
“አይ! የመሰረተ ትምህርት ዘመቻ”
“ የመሰረተ ትምህርት ዘመቻ ላይ ደርሰህበታል ?’ አለች አይኖቿን በግርምት አፍጥጣ ::
“ ሰባተኛው ዙር ደርሶብኛል ”
“በሕይወትህ ተደባድበህ ታውቃለህ?”
“ተደብድቤ አውቃለሁ፤ አጻፋውን ለመመለስ ግን ጊዜና አጋጣሚው አልፈቀደልኝም ”
“ unbelievable !”
“ ቤተሰቦቼ ባንድ ወገን ደብተራ ባንድ በኩል ቃልቻ ናቸው፤ ለማውጋት እንጂ ለመዋጋት የሚሆን ጂን ያልወረስኩት ለዚያ ይሆናል! ተረጂኝ”
ዝም አለች፤ በፊቷ ሞገስ ለማግኘት አንድ ነገር ለማድረግ ወሰንኩ፤ አስተናጋጂቱን ጠርቼ “ ዘማቹ ሰውየና ሚስቱ ያዘዙት ሂሳብ በኔ ነው “አልኩዋት፤
“ አንድ ጎድን ጥብስ፤ አንድ ክትፎ፤ እና አንድ ሩዝ ባትክልት”
ሰውየው ከራቱ ጋር ደርቦ ስንቁን እንዳዘዘ ገባኝ::
ትንሽ ቆይቶ ፤ ወደ ተቀመጥንበት መጥቶ አመሰገነኝ ፥
“ አንተ መሰዋእት እየከፈልህል እኛ ራት መከፈል አይበዛብንም” አልኩት፤ በውነት ግን ለራት የከፈልኩት ወደ ኢትዮጵያ ቢመነዘር ቆንጆ ቅጥቅጥ ባጃጅ ያስገዛል፤
“ አየ! በእንባ ብዛት ሀሳቤን አስቀየረችኝ እኔማ ልዘምት ወስኘ ነበር” ሲለኝ ምን ልበል፤
በንባ ብዛት ማስቀየር የማልችለውን የጋብዝኩበትን ደረሰኝ እያየሁ ተከዝኩ፤
